Ni Louella Artel Ramos (Paper Soul)
Ang istoryang ito ay hango sa kapalaran nating mga narito
Musmos pa lamang ay sinubok na ng mundo
Ipinangako sa sariling matutong gumawa ng sariling ilaw
Bawat hininga’y tungo sa pagliyab
Binabaybay ang buhay gamit ang sariling lampara.
Sa hirap at hikahos ay gustong lumubay,
Tatag ng loob, determinasyong walang kapantay
Diskarte’t hinasang talas ng isip ang panday.
Walang makapipigil sa takbo
Langoy, gapang, hakbang, subsob
Tuloy tuloy ang sugod tungong asenso
Ipinunlang pangarap
Pinayayabong ng pagsusumikap
Malapit na ang bunga, tanaw na ang pangarap.
Sa isang paghimbing, ang lahat
Ay binasag ng dagundong ng delubyo
Ginulantang ng yabag ng sigalot
Tila yumanig ang pundasyon
Sanay bumuhat pero tonelada ang biglang ibinagsak
Ginapos ng lamig, nilunod ng ulan
Ang lampara noong nagliliyab,
Hindi mahanap ang siklab.
Sa pagkayuko’y inabot ang
Magaspang na palad
Sa higpit ng kapit ay
Tila may mensaheng
Tara na, hindi ka nag-iisa.
Pagtingala’y lipon ng mga lamparang mapanglaw ang ilaw
Ang nakita, lahat ay kapit-bisig
Itinatagpi ng pangarap ang pagbangonsunod-sunod, unti-unti
Sa kanlungan ng isa’t isa
Pagtindig ay dumadali, gumagaan
Apoy na humina’y ngayo’y pinalalakas pa
Sama-sama’y dagitab ng pagkakaisa’y
Sumisilab ng bagong simula.
---
Paper Soul conducts spoken word poetry and music performances across Pampanga. They arrange and host workshops focusing on various aspects such as spoken word composition, poetry presentation, song creation, and similar activities.